Tuesday 31 July 2012

BANSA SERU



Ba senentang leboh maia tuboh bala anak Demong ka diau dalam menua Batang Paku begulai sejalai enggau bansa Beketan, kampong di menua Rimbas kena pegai menua Debak enggau menua Krian kena pegai menua Saratok sigi endang udah maioh bendar diuan bansa Seru. Endor bansa Seru tu diau ketebal agi di menua Bukit Tabujang, di menua Ulu Awek ka bepati ba Batang Krian, di menua Nanga Diso dalam ai Awek ka enda jauh ari Nanga Awek kira ka setengah jam bejalai kaki ari pasar Saratok, di menua Bukit Engkalat muak ke tebing ai Krian lalu edan jauh ari menua Nanga Melupa, Bukit Engkalat tu terang bendar dipeda ari tebing ai Krian lalu ulih peda ari pasar Saratok enggau ba bukit di Ulu Melupa pati ai Krian.
Bansa Seru tu ganas bendar bejalai disebelah kampong dalam. Sida iya balat bendar bemunsoh enggau bansa Iban rambau nya kelia. Keba tusah bendar bansa Iban rambau maia nya kelia laban maioh bendar bansa Iban tu parai kena bunoh bansa Seru leboh bansa Iban tu ke agi berimba ke menua, ngulu ke Batang Paku enggau menua Batang Layar.
Nyadi sama serambau enggau tuboh sida Demong tu, bisi tuai bansa Dayak Iban siko ka tampak bendar berita benama Jenua ka angkat pindah ari menua Langgong Bukit Kenyandang ari antara menua Ulu Sadong enggau menua Ulu Ketunggau ka mindah ngili ka Batang Sadong laban ka ngiga menua baru alai ngidup kediri. Ari menua Sadong iya lalu merau meraka Tasik China Selatan lalu tama Batang Layar alai iya ka lalu berumah ngidup kediri ba menua Pusa Kampong Engkerebang. Nyau kelama iya udah diau di menua Pusa alai iya pan lalu parai tuai.
Udah parai Jenua, iya lalu diganti Padang nyadi ka tuai megai anembiak sida iya di menua Pusa. Ari menua Pusa, Padang lalu ngulu ka bala anembiak iya pindah mudik ai Batang Rimbas lalu berumah ba menua ka di kumbai Skaup. Ari menua Skaup Padang lalu mai bala anembiak iya pindah baru masok Sungai Undai lalu berumah panjai ba menua ka dikumbai Letong Beluok.
Nyadi leboh sida Padang tu berumah ba menua Sungai Undai, sekali leboh sida iya ngereja pengawa nubai ikan, tuai bansa Iban ke benama Padang tu enda mukai mukai parai laban iya ditaban ke ikan tapah ngili ka Batang Undai ngagai Batang Rimbas, sereta lalu ngili ka Batang Rimbas nyentok ka iya datai rembus ba Batang Layar. Datai di Batang Layar, dia bangkai Padang ka ditaban ka ikan tapah ngulu ai datai naka Lubok Sedebu lalu ka ili ka naka pipi Tanjung Lilin ngalih ka ari ili. Nya alai laban naka nya bangkai Padang ka ditaban ka ikan tapah nya ngili enggau ngulu ka Batang Layar, nya alai naka nya ga rampa menua ka agi kena pegai Batang Rimbas datai ka kemaia tu hari agi masok ba Batang Layar.
Udah parai tuai bansa Iban ka benama Padang nya tadi, dia anak iya ka benama Gunggu lalu nganti iya nyadi ka tuai bansa Iban ba menua Batang Undai. Ari menua Letong Beluok, dia Gunggu lalu mai bala anembiak iya pindah baru mansut kediri ngagai Batang Rimbas lalu mudik ka ulu lalu berumah ngidup kediri ba menua ka dikumbai Nanga Jerai, ka ulih dipejalai kaki kira ka setengah jam ari SRK Suri, Debak ka diatu. Ba maia tu kelia ari menua Nanga Debak ka ulu endang sigi agi diuan bansa Seru. Tang sereta bansa Iban udah datai ba menua nya, sida iya lalu diau begulai sejalai enggau bansa Iban.
Angakat ari menua Nanga Jerai, tuai bansa Iban ke benama Gunggu tu lalu mai bala anembiak iya pindah baru ngagai menua ka dikumbai Tanjung Bakong ka endang tak beseberai enggau rumah alai bansa Seru tu diau. Nyadi laban sida iya ka sama beserimbai pendiau baka nya, alai sida iya laban bepangan tauka bekaban bendar enggau pangan diri. Bansa Seru tu nelap bendar enggau sida Gunggu tu, lalu suah bendar meri sida iya tambak enggau buah pisang kena ngidup kediri, sereta tebu enggau ubi ka diempa sida. Nyadi tuai bansa Iban ka benama Gunggu tu mati leboh iya berumah ba menua Tanjung Bakong tu, alai bangkai iya ka lalu ditumbak ka ba pendam bansa Seru di Pendam Batu ari ili menua pasar Debak ka diatu.
Udah parai tuai bansa Iban ka benama Gunggu, dia anak iya ka benama Garrai lalu nukar iya nyadi ka tuai bansa Iban ba Batang Rimbas. Angkat Garrai enggau bala anembiak iya ari menua Tanjung Bakong, dia sida iya lalu pindah baru ngagai menua muak ka seberai ka dikumbai Nanga Tawai. Nyadi endor rumah bansa Seru leboh maia tu endang udah bisi masok ba Sungai Tawai.
Nyadi sama serambau enggau tuboh tuai bansa Iban ka benama Gunggu, dalam Batang Rimbas bisi mega siko tuai bansa Iban ka benama Manggi. Nyadi Manggi tu mindah ari menua Tisak ngili ka menua Sungai Samudam, lalu ngulu ka menua Batang Layar. Nyadi dulu ari tu tuai bansa Iban ka benama Manggi endang udah ngulu ka bala anembiak iya mubok mungkal menua lalu diau ngulu ba menua Batang Tisak pati ari kiba Batang Skrang. Nyadi iya angkat ari menua nya udah bekau iya ka belaya enggau tuai bansa Iban ka benama Gelanyang Manang Jelapi ka lalu mati parai di bunoh bala anembaik iya empu ka lalu nyadi Batu Jelapi di menua Setirau, enda jauh ari ulu menua Nanga Lingga ba kaki Bukit Balau tebing kanan mudik ai Batang Lupar, di menua kena pegai Simanggang (Sri Aman)ke diatu.
Nyadi leboh tuai bansa Iban ka benama Manggi tu mudik Batang Layar, dia iya dulu ngetu enda lama di menua Sungai Sapinang. Angkat iya ari nya, iya lalu berumah ba ujong Tanjung Orang Tuai ka dikumbai Tanjung Pendam tauka Tanjung Rangka ngalih ari ulu ba endor ka dikumbai Supa.
Leboh iya benong niri ka rumah ba menua nya, dia iya lalu bisi ninga berita orang madah ka Batang Rimbas sigi udah bisi orang nguan. Laban irau ati ninga berita nya dia iya lalu ngabas kin bedarat neresap kampong nyentok ka iya nyau datai lalu rembus ba menua Nanga Debak. Apin lama iya udah datai di menua Nanga Debak dia tuai bansa Iban ka benama Manggi tu enda mukai mukai lalu kena sakit pedis perut, ka lalu ngujong ke iya parai. Bangkai Manggi tu lalu ditumbak ka ba Pendam Batu ari ili menua pasar Debak ka diatu. Nyadi laban iya ka ditumbak ka ba pendam tu sama begulai enggau tuai bansa Iban ka benama Gunggu, nya kebuah nyau datai ka kemaia tu hari agi orang maioh ngumbai Pendam Batu tu keterubah iya di pungkal Manggi lalu bisi mega nya dikumbai orang keterubah iya dipungkal Gunggu.
Nyadi laban udah bekau pemarai Manggi tu tadi dia rumah ka udah digaga iya di menua Supa nya tadi lalu enda tembu. Nyadi ketegal laban rumah Manggi tu tadi ka lalu enda tembu digaga serta nyau burok diri, nya alai endor iya ka berumah nya tadi lalu dikumbai orang kemaia tu hari Tembawai Burok Rumah.
Apin bengat lama udah sida tuai bansa Iban ka benama Garrai tu berumah ba menua ka dikumbai Nanga Tawai, alai bansa Seru lalu angkat mindah kediri angkat ari dalam Sungai Tawai lalu pindah ngagai menua Ulu Babu. Berengkah ari nya pendiau sida Garrai tu lalu nyau beserara tebelengka bendar enggau bansa Seru nya tadi.
Nyadi ari menua Nanga Tawai dia Garrai enggau bala anembiak iya lalu pindah baru ngagai menua Nanga Likap ka alai iya lalu parai tuai ba menua nya. Nyadi bansa Seru tu tadi pan lalu pindah baru angkat ari menua Ulu Babu lalu nyeliah diau ngagai menua Ulu Asam ba pati menua Melupa sereta nyimpang ba ai Batang Krian.
Leboh bansa Seru tu udah pindah berumah ba menua Ulu Asam nya tadi, nya baru bansa Seru enggau bansa Iban lalu berengkah beserekang penemu lalu enda rindu ke pangan diri ke lalu ngujong ke sida iya berengkah bemunsoh bebunoh, ngayau mulau pangan diri. Nyadi lama bendar bansa Seru enggau bansa Iban tu bemunsoh enggau pangan diri nyentok ka nyau bisi tuboh bala sida tuai bansa Iban ka benama Rakaya Antau Linggang Nengri diri menyadi ke nyadi tuai bansa Iban megai menua ba Batang Rimbas kejang nyau ka datai Rajah James Brooke di menua Sarawak dalam tahun 1839.
Nyadi tuai bansa Iban ka benama Antau ka bensumbar Linggang Nengri seduai menyadi iya ka benama Gun ari menua Rimbas tu endang orang ka beberita tau matak kayau anak lalu suah bendar beberita ulih ngalah ka bansa Seru di Bukit Engkalat, Bukit Legong, di Ulu Melupa enggau di sebelah Nanga Awek. Nyadi ketegal seduai iya ti selalu mujor ngalah ke bansa Seru, nya alai seduai iya lalu digela nama "Imam Maulana" ka nyadi ka tuai bansa Laut (Melayu) lalu diasoh megai perintah di menua Kabong ba nanga Batang Krian lalu diberi gela nyadi Rekaya.
Udah alah bansa Seru ba tiga bengkah menua nya tadi dia sida bansa Seru tu tadi lalu ngelari kediri ka menua Nanga Diso masuk batang Sungai Awek mimit enda jauh ari nanga enggau Bukit Tebujang di menua Ulu Awek kena pegai menua Saratok. Nyadi raban sida iya sebengkah agi lalu ngelari kediri ngagai menua Tanjung Pilin dalam ai Batang Sebelak ari ili Nanga Roban.
Nyadi leboh bansa Iban baru datai di menua nya udah bekau ka pindah ari menua Paku kelia, dia bansa Iban ka betuai ka Enchana ka bensumbar Letan enggau Luna ka bensumbar Panggau udu bendar beamok belaban enggau bansa Seru. Semadi nyau ka lama udah bemunsoh baka nya baru sida iya ulih deka bebaik enggau pangan diri udah ka besurong adat Palit Mata.
Nyadi di menua Batang Rimbas tadi udah bekau pemarai Garrai, iya lalu diganti anak iya ka benama Jana nyadi ka tuai bansa Iban. Nyadi endor tembawai rumah Jana tu di menua Tembawai Sandong dalam menua ai Babu. Angkat Jana enggau bala iya ari menua nya, iya lalu mai bala iya pindah sereta berumah baru ngagai menua Tembawai Manding dalam menua Metong, dalam ai Rimbas tebing muak ari kanan mudik. Angkat sida iya ari menua nya baru sida iya berumah baru di menua Nanga Gayau semak Jambatan Rimbas ka diatu ka alai iya lalu parai tuai. Udah parai Jana, dia bilik penaik, ruai tikai iya lalu ditampong anak iya ka benama Utong seduai Munan nyadi ka tuai bansa Iban ba menua Batang Rimbas.
Nyadi Munan tu tuai bansa Iban ka beberita bendar laban iya tau matak kayau anak. Munan tu mai bala anembiak iya berumah ba menua ka dikumbai Seragau. Angkat iya ari menua nya, iya lalu mai anembiak iya pindah berumah baru ngagai menua Nanga Luop. Udah berumah ba menua Nanga Luop, Munan lalu mai bala anembiak iya pindah lalu berumah baru ngagai menua di Nanga Tuang ari ili menua Nanga Bayor dalam ai Batang Rimbas, lalu kena pegai menua Debak.
Ari Nanga Tuang dia Munan seduai Utong lalu nyurut kediri baru, lalu pindah diau ngulu ka ai Babu. Ari menua Babu nya baru Munan seduai Utong lalu pindah baru mai bala seduai iya ngagai menua Melupa, pati ai Krian kena pegai menua Saratok ka alai seduai iya lalu parai tuai. Nyadi tuai bansa Iban ka benama Munan tu beberita matak ngulu ke anembiak iya ngayau anak berengkah ari Nanga Kalaka terus nyentok ngagai menua Nanga Oya bebunoh sereta bemunsuh ngelaban bansa Melanau.
Nyadi semua menua ka kala alah kena kayau anak oleh tuai bansa Iban ke benama Antau bensunbar Linggang Nengri, iya nya Kampung Jegedong di menua Nanga Skrang enggau ngalah ke menua Kali ari ulu menua pasar Kabong ke diatu dalam menua kena pegai Kalaka, nambah ka iya ti kala udah ngalah ke bansa Seru nya tadi.
Antau bensumbar Linggang Nengri tu mega kala udah mantu tuai kayau bansa Iban ka benama Linggir ka bensumbar Mali Lebu, ngayau ngalah ka menua Ilas semak enggau menua Nanga Rajang, enggau ngalah ka menua Matu ka alai endor bansa Melanau diau, lalu seduai iya kala sekali udah belanggar, besatup, betempuh sereta bebunoh ngelaban bansa Balau di menua Samudam.
Nyadi adi Antau ka benama Gun ti bensumbar Mangku Bumi ka nganti iya nyadi tuai bansa Iban pan kala mega matak kayau anak. Gun tu kala sekali di upah Laut (Melayu) ka benama Maulana di menua Kabong enggau pedang sebilah laban iya udah menang nalok ka bansa Melanau di menua Matu ba nanga Batang Rajang leboh sida iya ngelaban perintah maia ka agi kena pegai menua Brunei. Nyadi iya mega kala sekali di upah Laut (Melayu) ka benama Temenggong Kadir ngena bedil sebatang laban iya udah ulih ngemaik ka penyarut bansa Balau di menua Lingga ti charut ngelaban perintah menua Brunei maia nya mega. Gun tu mega kala mantu tuai bansa Iban ka benama Unal ka bensumbar Bulan ari menua Ulu Layar belanggar, betempuh sereta bebunoh enggau tuai bansa Iban ke benama Ijau ari menua Banting di menua Palasan semak Nanga Saribas.
Nyadi asal bansa Beketan di Batang Rimbas nya peturun niang Guling seduai Gambang. Nyadi tuai bansa Beketan ke benama Guling seduai Gambang tu iya nya, menyadi tuai bansa Beketan ka benama Entinggi ari menua Batang Paku. Nyadi Guling tu nyerara kediri ari betuai ka menyadi iya Entinggi di menua Bukit Saban laban ka mai bala anembiak iya pindah berumah ba menua ka dikumbai Tinting Indai Tupai. Sekumbang Guling tu enggau bala iya berumah ba menua nya, dia mentua iya ka benama Kuku pan parai lalu baka nya mega bini iya ka dikumbai sida Indai Tupai pan parai dia. Nyadi ketegal laban mentua Guling ka benama Kuku tu parai ba tembawai nya laban kena taju remaong, nya alai bisi endor siti semak menua nya dia ke lalu dikumbai orang nyentuk ka sehari tu benama Taju Kuku.
Udah bekau pemarai bini enggau mentua iya nya tadi, dia Guling lalu mai bala anembiak iya ngelari kediri pindah melunggang ngulu ai Rimbas lalu diau ditinting Tibak Sirat ba menua enda jauh ari Ulu Gerugu ke bepati ba ai Ulu Sarikei. Nyadi Ulu Gerugu tu nya alai bepuncha ari Kampung Gerugu ke lalu nyadi satup menua Ulu Sarikei, Ulu Awek, Ulu Kabo enggau Ulu Sebelak. Pindah ari menua Tibak Sirat dia Guling lalu mai bala iya pindah baru ngagai menua Bukit Tebalu di menua Ulu Budu ka bepati ba ai Krian. Ari nya baru sida iya angkat pindah baru ngagai menua Bukit Tebujang ka alai sida iya lalu segulai pendiau enggau bansa Seru di menua Ulu Awek.
Nyadi menyadi Entinggi ka benama Gambang tu nyerara ka diri ari betuai ka iya di menua Bukit Saban Tinggi dalam menua Paku laban ka mai bala anembiak iya pindah ngagai menua Telok Jerai. Angkat ari Gambang lalu mai bala anembiak iya pindah baru ngagai menua ka dikumbai Tinting Girau ba antara menua Krian enggau menua Saratok. Udah berumah ba menua Tinting Girau, Gambang lalu mai bala iya pindah baru ngulai bansa Seru diau di menua Bukit Engkalat enda jauh ari pasar menua Saratok ke diatu.
Nyadi raban bala sida Guling ka diau begulai enggau bansa Seru di Bukit Tebujang nya tadi lalu pindah baru ngagai menua Sugai ka bepati ba ai Julau lalu ngidup kediri baka orang maioh.
Nyadi leboh tuai bansa Iban ka benama Kaya nyadi ketuai ba menua Ulu Paku nampong pengawa tuai bansa Iban ke benama Entigu, dia alai tuai bansa Iban ka benama Akin ti datai ari Skrang lalu minta ngagai iya madah kediri ka pindah kia lalu berumah ba menua ka dikumbai Nanga Munan. Akin diau enggau bala anembiak iya dia sepengelama tiga tahun aja. Udah berumah ba menua nya tiga tahun iya lalu mai bala anembiak iya pindah baru melunggang ari Batang Paku ngagai menua Teru ka bepati ba ai Rimbas lalu berumah dia. Kira lima tahun udah bala sida iya berumah dia, Akin lalu mai bala iya pindah baru melunggang ka menua Ulu Ulai ka bepati ba ai Bayor. Nyadi alai tembawai rumah sida ba menua Ulu Ulai nya tadi ka ba menua ti dikumbai orang Nanga Bejit, laban menua nya kelia maioh bendar bansa kera ka dikumbai Bejit.
Ba menua tu sida Akin bedau pechah enggau pangan diri. Udah meh tuai bansa Iban ke benama Akin tu parai ngulu ka bala anembiak iya ngayau ngalah ka Kampung Gerugu di menua Sarikei, iya lalu diganti menantu iya ka benama Sibat nyadi ketuai baru sida iya berumpang ka menua ngulu ka Batang Bayor alah meh nyau datai nyentok ka Sungai Randau lalu rembus ngagai entigis Ulu Bayor ka bendar.
Nyadi laban sida peturun Akin tu, ukai anembaik peturun sida Jenua ka datai pindah ari Nanga Rimbas, nya kebuah orang ka nguan menua Batang Bayor lalu ngumbai diri bansa Bayor datai ke sehari tu laban penatai sida iya lain agi ari orang ti diau ngerejang Batang Rimbas.
Endang berengkah ari tuboh Akin ka tau kayau mungkal Batang Bayor, nya alai orang ka diau nguan menua nya sigi beberita endang kering bendar ati ngereja semua pengawa. Ari sida ka keih sereta masin ngereja semua pengawa nya alai maioh bendar orang bukai bechuan beteladan ka pengawa enggau pendiau bansa Bayor tu.
Nyadi bala bansa Beketan ka peturun tuai ti benama Guling ka diau di menua Sugai, Julau mega bisi sekali udah ngayau ngalah ka rumah panjai bansa Iban di Karangan dalam ai Krian kena pegai menua Saratok. Nyadi pemanjai rumah orang Karangan rambau tu kelia ka sepuloh pintu aja. Nyadi bisi siko sida serumah di menua Karangan dia ka diau enda betampong enggau orang maioh ti benama Jilap. Jilap tu diau ngaga rumah nangkir orang dia ba pelaboh nungking ba tebelayar orang semak pala tangga.
Iya meh kira ka nyau ka dini hari alai bala Beketan tu mansang nuntong ba rumah panjai orang Karangan, sida lalu ka ngalah ka rumah nya. Bala Beketan tu ka nyerang rumah nya enda lalu tama ke dalam bilik tang sida iya semina ngipa sida ba mua pintu bilik laban ka nganti orang serumah nya ka bisi pansut ka ruai mansang ka bekindu ngagai bedilang. Nyadi sebarang orang ka bisi pansut ari bilik ka ruai endang lalu dibunoh sida ba mua pintu bilik sida empu nya magang. Nyau udah maioh bala Iban mati dibunoh bala Beketan nya tadi hari pan lalu tekerebak tebererak tawas.
Udah tembu sida Beketan tu munoh bala Iban di menua Karangan, sida pan lalu mulai kediri nurun ari tangga ngalih ari pelaboh muak ka alai rumah Jilap nungking nya tadi. Nyadi Jilap tu belalai ba baroh tangga sereta endang tak seruran ngerurok ngena sangkoh munoh bala Beketan ka bisi mansa iya nya berari. Nitih ko cherita nyau datai dua tiga iko bansa Beketan tu ka parai direjang iya sekali. Nyadi sida serumah tu ka semina siko Jilap tu aja ka ulih ngelaban bala munsoh.
Nyadi bala Iban bukai ka diau didalam rumah, barang sapa ka ulih ngelalai kediri enda mega mati dibunoh bansa Beketan, lalu laban bansa Beketan ka nyerang tu mega nadai tama ka dalam bilik ngiga bala sida nya serumah. Lalu pia mega barang sapa bagi bala Iban ka ulih muai diri ka tanah, lalu nya ka ulih idup ngelari kediri, laban bansa Beketan enda meda sida ketegal hari ti agi petang. Nyadi sekumbang Beketan ka bebunoh ka bala Iban dirumah, sida endang nadai sekali nemu bisi orang bukai ka diau ba pelaboh ari luar rumah panjai nya. Nya kebuah maioh bendar bala Beketan parai ulih ka dengah Jilap.
Lalu baka nya mega leboh rumah panjai Temenggong Tandok ka dialah ke tuai bansa Beketan ka benama Janting di menua Nanga Melupa. Lalu ka semina siko Jilap tu aja mega ka ulih nitih lalu munoh munsoh sebuah perau ka ngumbai diri pulai menang ngayau nya tadi.
Nyadi sekali nyau datai ba tuboh uchu Demong ka benama Belaki nyadi ka tuai bansa Iban, leboh iya bumai di menua Tanjong Kundong dalam menua Paku, iya empu enggau bini iya ka benama Beremas sereta enggau ipar iya ka benama Kadir sama mati parai kena bunoh bansa Seru benong sida tiga iya mantun ba umai. Nyadi penatai Seru ka kayau anak tu ari Bukit Engkalat dalam menua Krian. Ari nyin sida Seru nya nyemerai Batang Rimbas enggau Bayor lalu betiki ari Nanga Ulai nuju Bukit Tampak Panas. Ari nya sida iya bejalai ngili ka menua Pangkaru nyentuk ka datai ba nanga, lalu ngili ai Paku nyentuk ka sida iya datai ba menua Tanjung Kundong ari ili Nanga Anyut. Semua menua ka udah kena pansa sida bansa Seru tu tadi endang apin bisi diuan bansa Iban magang lalu bedau dikumbai semua kampong dalam.
Nyadi pala Belaki ke udah dipumpong bansa Seru tu ulih ditaban ka bansa Seru tu lari. Leboh sida Belaki serumah begau meda munsoh udah ngelari kediri nya alai Jimbai, Umar, Jelema enggau Buma lalu mupok nitih nyidi bekau sida nya tadi. Laban ka beguai nitih ka bala munsoh bansa Seru ka ngelari kediri nya tadi, empa pengering Jimbai nitih ko cherita leboh sida iya datai ba ai Samu endang lalu diperejok iya lalu laboh diseberai. Sida lalu nitih ka munsoh nya tadi ngulu ai Paku, datai di menua Nanga Pangkaru sida iya lalu ngulu ka ai nya. Nyau datai di Nanga Sungai Kara, sida iya lalu niki ka Bukit Taju Beketan lalu ninting ngagai Bukit Tampak Panas.
Datai ba Bukit Tampak Panas nya baru sida Jimbai tu betemu enggau munsoh bansa Seru ti ngelari kediri udah ka naban pala Belaki, ti benong niki buah engkeranji padi. Jimbai laban iya ka tegar agi sereta dulu lalu tepeda ka munsoh nya siko benong dudok dugau dugau nyadi wan ai benong dudok ngantuk. Nama agi deh, enda chamang chamang agi Jimbai lalu dientak iya enggau sangkoh alai munsoh nya tadi lalu parai dia. Semua bala munsoh nya tadi pan lalu pambar alah enda ngelaban bala sida Jimbai. Nyadi sida Jimbai enda teulih ke pala maioh laban sida iya tembu gagau belulong ka munsoh ka benong niki buah engkeranji padi nya tadi. Semua pala ka ulih sida iya ka tiga igi aja, lalu bala munsoh nyau ngelari kediri enda temu tungga, lalu sida pan enda mega tetitih ka munsoh agi laban nyau lepi sereta ikak laban enda makai.
Nyadi pala Belaki ka udah ulih bansa Seru nya tadi lalu teberayan enda agi ulih ditaban ka sida iya rari, lalu ditumbak ka sida Jimbai ba pun tapang ka lalu dikumbai Tapang Panas. Udah tembu sida numbak ka pala Belaki nya tadi, dia sida lalu baum madah ka Tapang Panas tu lalu ka pesaka uchu ambu sida ka sama udah begau ka penusah tu.
Nyadi menyadi lelaki Beremas ka benama Uyut ka bensumbar Bedilang Besi enda enggau sida Jimbai nya nitih ka munsoh, laban rumah iya jauh di ili sereta enda nemu orang begau ka penusah nya. Laban nya alai uchu ambu Uyut ka bensumbar Bedilang Besi enda enggau orang makai Tapang Panas tu ka nyadi alai sida Jimbai udah numbak ka pala Belaki.
Nyadi leboh Belaki seduai Beremas tu parai di bunoh bansa Seru, bala anak seduai ka benama Bayang, Ugap enggau Lada endang agi mit. Udah bekau nya menua lalu majak kachau sekachau. Beketan nyau maioh nyadi munsoh bansa Iban, di menua Nanga Layar mega bansa Bajau enggau bansa Lanun suah ditemu ngerompak di tasik, lalu baka nya mega bansa Punan enggau Beliun pan nyau mansang siga lalu nulong bansa Seru bebunoh ngelaban bansa Iban.
Meda menua nyau majak mansang kachau, nya alai Bayang pan lalu mai bala anembiak iya ngelari kediri ari menua Batang Paku ka menua Ulu Samu lalu berumah di menua Nanga Meluang. Ba tanah tu nyamai agi alai sida iya ngikup ka musoh.
Leboh sida iya diau ditu, Lada pan nyau baru ngangkat kediri dara. Nyadi sekali bisi tuai bansa Iban datai ari Skrang ti benama Awan nemuai ngagai menua Batang Paku lalu bemalam ba rumah sida Bayang di Nanga Meluang. Awan tu tuai bansa Iban ka beberita berani bendar lalu suah udah ngulu ka anembiak iya matak kayau anak.
Sekumbang iya ka berandau enggau sida Bayang, Awan lalu madah ka kebuah diri ka datai nemuai kia laban iya bisi ninga penusah bansa Iban di menua Paku Ulu ka suah bendar udah tebunsa sekumbang Belaki ka udah parai dibunoh bansa Seru. Iya lalu madah kediri ka nanya Lada nyadi ka bini enti sida Bayang setuju ka nerima iya, awak ka iya bisi enggau sida sama nyaga menua Paku ari kena langgar bala munsoh. Umor Awan rambau iya ka nanya Lada nya ka bini sigi endang udah tuai lalu bulu pala iya endang sigi udah beselat uban.
Nyadi jako Awan lalu diterima sida Bayang, sida Uyut Bedilang Besi laban sida mar bendar deka nyaga menua diri ari kachau bala munsoh sida ka ngemaioh nya penatai. Tang adat jadi melaki bini dipinta sida besai bendar nitih ka adat Gupi ka jadi enggau Gerasi Belang Pinggang, ka lalu ditambah ka enggau bunga pinang sigi alas ngerang, pemuka pintu pedang sebilah, simbak kelambu nya bujak sepuchok. Awan lalu madah kediri setuju lalu sanggup ngisi adat ka di pinta sida Bayang nya, laban adat nya ko iya sigi nitih ka endang adat tuai dulu.
Udah iya madah kediri ngisi adat pinta sida Uyut Bedilang Besi, Awan lalu minta bedil nyadi ka jamban iya meraka Batang Layar enggau Paku, sumpit sepuchok nyadi ka lalau, laban ka jalai tua nitih ka iya ka endang raja bujang berani sereta tau kayau. Semua adat ka dipinta Awan tu lalu diisi sida Bayang magang. Awan seduai Lada pan lalu melah pinang jadi melaki bini.
Udah bekau nya enti anak telesak enggau uchu ambu seduai belaki bebini ka menua jauh, adat tu agi mengkang dikena sebut berari nyentuk ka sehari tu.
Nyau kelama Lada seduai Awan tu udah jadi melaki bini seduai iya lalu nadai anak. Nyadi sekali Awan lalu bisi mimpi diasoh antu ngiru anak ka benama Sawai. Dani iya pagi nya lalu nusoi mimpi diri ngagai Lada. Ninga mimpi Awan munyi nya Lada lalu ngasoh Awan belelang ngiga anak indu ka benama Sawai nya tadi nitih ka padah antu dalam mimpi.
Hari siti Awan lalu nurun nemuai ngagai menua Rimbas laban dalam Batang Paku iya lalu nadai tetemu ka indu ti benama Sawai. Nyau ka lama iya udah bejalai iya pan datai di menua Rapong nemuai ngagai rumah Numpang. Leboh iya niki rumah nya semua orang ka kena pansa iya ka bejalai niti ruai lalu bela nudok ka iya magang. Tang Awan madah ka diri enggai laban iya deka dudok ba ruai tuai rumah. Datai iya ditengah rumah nya iya lalu didudok ka orang, lalu iya pan dudok. Apin lama iga iya udah dudok dia lalu mansa indu siko ka benong nyandik anak mansa iya dia. Anak mit ke disandik nya pan lalu nyabak. “Nya Sawai badu agi nuan nyabak, enggai ka temuai nganu lagi,” pia ko indai anak mit nya tadi ngaum anak iya. Ninga jako indai orang nya enggau anak iya, Awan lalu berunding ingat ka mimpi diri dalam ati iya. Nyadi indai anak mit nya pan endang orang ka beempu bilik ka alai iya dudok nya tadi.
Udah meh badu makai lemai nya, orang menua Rapong serumah nya semua indu lelaki lalu bela ngulu penatai Awan nya magang. Pagi udah badu makai Awan lalu madah kediri deka ngiru Sawai nya ka anak. Apai indai anak mit indu nya bernama Nuai seduai Numpang pan nadai maioh jako lalu endang deka pan meri anak nya laban seduai iya ngelala Awan nya sigi kaban sida iya empu ka datai ari menua Paku. Pemerani Awan tu pan endang lama udah ditemu sereta didinga sida iya berita.
Dua tiga hari udah nya Awan pan lalu mai sawai mulai kediri ngagai menua Paku. Datai seduai iya dipendai sida empu di Nanga Meluang dalam menua Samu, lalu leboh Awang benong nyungga ka Sawai tu mandi burong bejampong kanan pan lalu bemunyi. Manah burong tu pia ko Awan laban nya ngayu ka peturun Sawai deka menang diau dalam menua nya ila.
Apin bengat lama Sawai udah diiru Awan seduai Lada ka anak, alai Lada pan lalu betuboh bisi, lalu beranak ka Jering. Nyau besai Sawai iya pan lalu belaki ngambi Kaya lalu beranak ka Jantan, Cheraring ka lalu nyadi bini Jiram Rentap, Nyaru, Lumpoh, Sian enggau Endayan.
Nyadi Jering lalu belaki jadi enggau Entemang anak Uyut Bedilang Besi seduai Nangku. Seduai tu nadai anak, nya alai seduai iya lalu ngiru Sian anak Sawai seduai Kaya.
Udah mati Busu apai Uyut Bedilang Besi, Awan lalu matak anembiak iya berimba ka kampong ngulu ka ai Paku. Angkat iya ari Nanga Meluang, sida iya lalu pindah ngagai menua Sungai Labi. Ari nya sida iya lalu pindah baru sereta berumah ngagai menua ka dikumbai Tembawai Engkabang. Ari rumah tu Awan matak bala anembiak iya pindah baru ngagai seberai menua di Nanga Jukun. Ari nya iya lalu mai bala iya pindah baru ngagai Tembawai Nunggi. Ari Tembawai Nunggi nya baru sida iya berumah ba Lubok Lauk. Ari nya sida iya berumah di Sungai Mengeris. Ari nya sida iya angkat lalu berumah baru di Tembawai Temiang. Ari Tembawai Temiang sida iya lalu nyurut kediri baru lalu berumah di Lubok Lauk baru. Ari Lubok Lauk sida iya mindah lalu berumah ba banchak Nanga Perak.
Leboh berumah ditu nya baru Awan magi menua ngulu Sungai Buong naka Boung Rambing. Nambah ka nya iya lalu magi tanah ngulu Sungai Perak enggau Sungai Banyang. Awan tu parai tuai dirumah iya di Nanga Perak.

Jerita Dulu Kelia

BATANG MANDAI




Ditulis niang Teni Anak Geboh dalam taun 1975

KEMPING PADI
Nyadi Kemping Padi Belimbing Besi, Sempa Jawa Sitangga Tali tu menyadi tuai sida Keling. Iya sama beapai ka Jemuring Gading. Raban sida Jemuring Gading nya kelia enda tusah enda irau ka bala sida mati. Laban ko penemu sida, enti sida iya mati sida tau idup baru. Sida iya enda ga tau idup baru enti sida enda ingat ka aki-ini sida. Sabengkah agi, raban sida nya nadai bepusat ba tengah perut, enda bepusat baka kitai kemaia tu hari.

Nyadi Kemping Padi nya menyadi tuai sida Keling ke mati lulus. Nya alai leboh iya mati, sida apai-indai iya enda tentu irau ka iya, laban sida nemu iya tau idup baru. Ari nya sida enda ingat ka adat meri iya baiya besi, baiya bari.

Bangkai iya disimpan dalam rarong lalu lalu ditumbak ka ba pendam. Enda lama udah nya, alai parai ga menyadi sida Kumang ke tuai. Pemarai iya sebaka enggau pemarai Kemping Padi. Baka nya ga sida enda tingat ka adat meri iya baiya besi, baiya bari. Iya lalu ditumbak ka sida sama begembar enggau bangkai Kemping Padi. Tembu sida ke numbak ka bangkai iya tadi, lalu pulai ke rumah. Nyadi seduai ke mati nya kenu ko cherita, tuboh seduai lalu terengkah di menoa Mandai Mati.

Nyadi menoa Mandai Mati nya keno ko Cherita, nya menoa Sebayan. Nama tuai ke megai menoa nya, Raja Runyam. Iya jaga Pintu Tanah, antara menoa Sebayan enggau menoa kitai ke agi idup di dunya tu.

RAJA RUNYAM
Datai seduai iya ba rumah Raja Runyam, dia seduai lalu dudok. Dia Raja Runyam lalu nanya seduai.
“Nama kabuah seduai tau datai ditu ?” pia ko iya.
Dia Kemping Padi lalu nyaut. “Nyadi kami duai tu sama udah mati. Udah kami duai ditumbaak ka orang, kami duai lalu terengkah ba menoa nuan ditu. Kati kami duai tu aya agi tau nikaal pulai ngagai menoa kami kin ke baru ?” pia ko Kemping Padi.

Ninga nya, Raja Runyam laalu nyaut. “Seduai enda tau pulai ke menoa kita empu agi, laban apai-indai seduai leboh seduai parai enda nitih ka adat asal aki-ini kita dulu kelia. Nya alai baka tu ko gaya adat nya:
Enti kita parai, kita enda tau enda mai papong besi.
Enti kita lela, kita enda tau enda mi leka igi jawa.
Enti kita laya tumbang, kita enda tau end mai leka benih padi bangang.
Nya baru seduai tau pulai ke menoa baru. Nyadi seduai tu, enda dibaiya orang enggau semoa utai nya tadi. Nya alai kategal nya seduai enda tau pulai ka menoa kita kin agi,” ko jako Raja Runyam.
“Kati ko pengujong kami duai tu deh aya ?” ko Kemping Padi.
“seduai tu jadi melaki-bini lalu seduai nyadi raja di menoa Sebayan tu,” pia ko Raja Runyam.

Udah nya Raja Runyam lalu ngator seduai nyadi raja, dia iya lalu nanya ka nama seduai. Kemping padi lalu madah ka nama diri. Iya lalu madah ka nama indu ke enggau iya nya, Kumang Reging Bungai Angi.

Nya alai ninga nya, dia Raja Runyam lalu mindah ka nama indu nya.
“Uji pindah ka mimit nama nuan nya,” pia ko iya.
“Manah agi enti iya diberi nama. Kumang Lemping Sebayan.”
Nya alai lalu Kumang Lemping Sebayan meh nyadi ke nama bini Kemping Padi.

Ninga Raja Runyam madah ka seduai enda ulih pulai ke menoa agi, dia Kemping Padi lalu nanya baru.
“Enti kami dui tu enda ulih nikal bru puli ke menoa, ko nuan, kti ulih ga kami duai tu nemuai ?” pia ko iya.

Ninga munyi nya, dia deh Raja Runyam lalu nyaut.
“Enti seduai deka nemuai ka menoa Igat, ngaga danji seduai. Iya nya danji Sebayan enggau kita mensia di menoa din. Enti nya udah digaga ka danji ila Igat, nya baru kitai di Sebayan tu tau nemuai ka menoa, lalu orang ke idup di menoa pan tau ga nemuai ngagai kitai di Sebayan ditu,” pia ko Raja Runyam.
“Enti munyi nya aya, uji kitai ngaga danji enggau orang ti agi idup di menoa, awak ka kitai tau nemuai kin-kitu,” pia ko Kemping Padi.
“Enti seduai keran deka nemuai ka menoa ngusong apai-indai enggau kaban-belayan, diri menyadi seduai Igat, uji meh kitai tiga ngaga danji enggau sida,” pia ko Raja Runyam.
Arammeh aya kitai ngaga semaia,” pia ko Kemping Padi.

Udah nya Raja Runyam lalu mai Kemping Padi seduai Kumang Lemping Sebayan nanam anak kayu tebelian ba puchong Bukit Mandai ke mensol baka bunchol setawak, ba tuchong ke pemadu tinggi antara menoa Sebayan enggau menoa kitai di dunya tu.

KAYU SEMAIA
Datai sida tiga ba bunchol Bukit Mandaai nya, sida tigaa lalu ngetu. Dia Raja Runyam lalu bejako.
“Nyadi nuan Igat, nanam anak kayu tebelian tu. Bini nuan ngemata ka nuan. Lagi aku nyampi ka kitai tiga,” ko iya.

Nyadi Kemping Padi lalu belaboh ga ngunjam ka anak tebelian nya. Bini iya ngemata ka iya. Raja Runyam lalu belaboh nyampi. Baka tu munyi leka sampi iya :
“Nyadi nuan tu kayu tebelian ditanam Bujang Kemping Padi Raja Berani ba atas tuchong Bukit Mandai tu. Nuan tu meh benama Tebelian Semaia.

Leboh puchok iya rinda, semoa tuchong Bukit Mandai nya ayong magang laban daun iya. Leboh dun iya ngeruyong, semoa puchok iya begulong panjai baka batang iya empu. Enti kitai meda iya ari jauh, enda nyalah-nyalah baka pala ular. Enda mega puchok iya ngeruyong, lalu enda mega iya rinda belama, bisi maia iya tau bebali baka nya.


APAI PENUTOP
Nyadi menoa orang ti mangkang kaki Bukit Mandai Idup nya menoa Memaloh. Rumah Memaloh nya panjai bendar. Lalu rumah sida nya kena pansa orang ti nemuai ka Sebayan, lalu kena pansa jalai Sebayan nemuai ke menoa kitai di dunya tu.

Bisi deh maia nya menya tuai bansa Memaloh siko ke benama Apai Penutop. Iya tu endang sigi raja berani, manok pungka lelaki Memaloh di menoa nya. Nya kelama Apai Penutop ti ngemata ka bala orang ti nemuai ka Sebayan, lalu bala Sebayan nemuai ke dunya tu, dia iya lalu berunding dalam ti diri.
“Enti baka tu, salah bendar penemu batang Tebelian Semaia nya tau ngasoh orang nemuai kin-kitu. Enti menoa Sebayan din manah agi ari menoa adap kitu, tentu orang di menoa tu abis pulai kin ka magang. Gauk bendar pun Tebelian Semaia nya. Lagi asai iya aku tebang. Enti Tebeliaan Semaia nya udah tumbang tentu nadai jlai sida nemuai kin-kitu,” pia ko runding Apai Penutop.

Tembu iya ke berunding munyi nya, iya lalu nyengku beliong, lalu nurun ngagai tuchong Bukit Mandai. Iya lalu nuju pun Tebelian Semaia nya. Datai iya din, lalu ngaga tiang tundan. Tembu iya ngator tiang tundan, dia iya lalu belaboh nebang. Leboh nya dan Tebelian Semaia nya benong bediri ngembar batang lalu daun iya pan ngeruyong malut dan. Batang iya leboh nya enda nyalah-nyalah baka turus, lalu chegit-chegit ke atas baka ke nadai dan. Puchok iya baka pala ular. Nyau kepuas Apai Penutop ke nebang, iya pan nyau lelak, dia iya lalu muka sirat, lalu dilempai ka iya ba atas tundan.

Nyadi muak bukit adap ngagai Bukit Mandai Mati nya kebun terong Sebayan, endang dandang buah terong Sebayan magang-magang. Leboh nya Kumang Lemping Sebayan enggau indu enam iko, tujoh nyengkaum iya empu, mai sintong ngarang buah terong ba semak Tebelian Semaia ke ditebang Apai Penutop. Ninga Apai Penutop tak retook-retok, dia Kumang Lemping sebayan lalu ngangau.
“Oh Apai Penutop, nama gaga nuaan diaa ?” ko Kumang Lemping Sebayan.
“Eh, aku tu nebang Tebelian tu,” ko iya.
“Au tebang meh,” pia ko Kumang Lemping Sebayan.

Nyadi sida tujoh nya lalu enda tentu ngarang buah terong, laban ngenong meda Apai Penutop tak telanjai. Sida richah ketawa ka iya telanjai. Nyau kepuas Apai Penutop nebang, dia Tebelian Semaia ny lalu tumbang. Udah rebah Tebelian Semaia nya, dia Apai Penutop lalu beguai-guai melit ka sirat iya baru.

Udah nya Kumang Lemping Sebayan lalu ngangau ka Apai Penutop.
“Oi Apai Penutop. Anang guai nurun nuan. Kami deka niki kia, lalu berandau enggau nuan.”

Bala indu tujoh iko nya lalu sama niki, lalu sama berimbai-rimbai dudok ba atas tempangan tunggol tebang. Udah nya Kumang Lemping Sebayan nanya ka kebuah iya nebang tebelian nya.
“Nama kabuah nuan keran deka nebang kayu tu deh aya Apai Penutop ?” ko iya.
“Kabuah aku nebang kayu tu, laban antu Sebayan enggau kami ke idup nyau gulang-galu, kin-kitu. Enggai nyadi pengawa baka nya. Enti baka nya belama pengawa sida, tentu dunya tu bepusin enda temu tungga ila, lalu enda temu ni bagi mati enggau idup. Nya kebuah aku nebang tebelian tu,” pia ko Apai Penutop.

Udah nya Kumang Lemping Sebayan lalu bejako,
“Nyadi kayu tu benama Tebelian Semaia, semaia orang ke idup enggau orang ke mati. Seagi-agi iya idup tauka bediri, Sebayan enggau orang ke idup tau nemuai kin-kitu. Nyadi batang tebelian tu udah tumbang ditebang nuan. Tu meh naka pengujong danji orang Sebayan enggau mensia. Sida enda ulih nemuai kin-kitu agi ngundang kaban.”

Udah nya Kumang Lemping Sebayan lalu bejako baru.
“Kitai sama malik ngagai ujong Tebelian,” ko iya.
Leboh sida malik, dia sida meda batang tebelian nya tak putus ba pun dan baroh. Semoa batang iya berengkah ari pun dan nya, lalu ka puchok, nya bebali nyadi ular nabau. Iya lalu ngelantar nurun bukit nya ngagai Batang Mandai. Nyadi tengan batang, lalu bebali nyadi ular naga. Nya ngelantar muak ke mata hari mati, melunggang tuchong Bukit Mandai.

“Enti baka tu, nurun kitai ari tu enggai ka tuga tebelian tu bebali lagi.” Ko Kumang Lemping Sebayan.
Ninga munyi nya, sida lalu sama nurun magang ari tuga nya. Udah nya semoa sida lapan nya nyau datai di tanah. Sida iya pan sama bediri magang. Enda lama udah nya sida lalu ninga tuga Tebelian nya tak tepol-tepol munyi nyawa setawak. Tiga kali iya bemunyi:
“Git-gong, git-gong, git-gong,” iya pan lalu belah. Sepiak ke muak matahari mati lalu angkat terebai ke atas kin, lalu bebali nyadi jelu remaung.

“Ari Bukit Mandai tu meh asal penatai naga, nabau enggau remaung dalam dunya tu.” pia ko Kumang Lemping sebayan.
Udah nya Kumang Lemping Sebayan lalu mabut tuga buloh sapuchok, lalu dibai iya kia. Iya lalu nanam tubu buloh nyaba pun tebelian ke udah pechah lalu bebali nyadi remaung taadi. Sambil iya nanam tubu nya, iya lalu bejako enggau Apai Penutop, tuai Memaloh nya.
“Nyadi buloh tu tauka daun iya tau diambi mimit, lalu tuga Tebelian tu diambi mimit mega. Udah nya tau digelut ka ba tuboh lelaki tauka indu, lalu tau mega digaga kena empa lelaki enggau indu. Enti indu ngelut ka iya ba tuboh lelaki, lelaki nya enda tau enda beraie ka indu nya. Enti lelaki ngelut ka iya ba tuboh indu, indu nya beraie ka lelaki. Buloh tu meh dikumbai orang “Buloh Pengerindu”, tau diambi ka jayau lelaki enggau indu, laban miang buloh tu tau tama tuboh, lalu nyidi tulang enggau urat kitai,” pia ko Kumang Lemping Sebayan.

Tembu iya mansut ka jako iya, dia Kumang Lemping Sebayan lalu mai Apai Penutop pulai.
“ O Apai Penutop, tu meh naka Sebayan tau begulai enggau kita ke idup di menoa, laban Tebelian Semaia tu udah ditebang nuan. Putus meh semaia kitai. Nuan pulai,” ko Kumang Lemping Sebayan. Tembu iya bejako, dia sida tujoh lalu lesap.

Apai Penutop lalu pulai ka rumah iya empu. Datai di rumah, lalu nusoi semoa berita utai ke udah nyadi dikereja, dipeda enggau didinga leboh iya nebang Tebelian Semaia nya. Nya pun semoa orang nemu cherita tu.


TAJAK SEDUAI BANGI
Leboh maia nya menya, Apai Penutop bisi anak dara siko bajik bendar gamal. Rambau nya mega bisi bujang siko ba rumah nya sigat bendar gamal. Iya nya meh nyadi raja berani dalam Batang Memaloh. Nyadi lelaki nya Tajak, lalu indu nya Bangi. Seduai nya lalu diator apai-indai seduai jadi melaki-bini. Seduai pan sama deka ga ka pangan diri. Nya alai seduai lalu jadi melaki-bini.

Nyau kelama seduai iya udah jadi, dia Bangi lalu ngandong. Kandong iya pan chukop bulan, iya lalu beranak. Leboh Bangi beranak, orang lalu begau ka Tajak paraai ngenyit. Nya alai naka penusah meh sida iya, Bini beranak, laki mati. Orang lalu ngator Tajak nitih ka adat sida Memaloh.

Sebulan iya udah beranak, dia Bangi lalu berengkah betenun. Anak iya pan mansang besai. Iya nyau tau meragau, tau ngelalau, dia iya kena nyelai. Iya seruran nyabak berari-ari nekaau indai iya. Iya ke nyabak nya enda temu utai dipinta, lalu enda ulih perindang enda ulih kemadu. Laban indai iya endang sigi ngemeran ka pengawa betenun, dia iya nyau kelabawan ati, Enda berasai agi ati iya ke pedis ka anak gila nyabak, lalu nekong kening iya ngena belia. Kening anak iya telih lalu bedarah. Anak iya makin balat agi nyabak.

Nyadi rambau nya bisi orang siko apai tuai orang ba rumah sida dia, bansa Lawai, bedagang tajau. Dia iya ninga anak mit nya mangka ka diri nyabak, nyau enda ulih perindang indai iya. Meda anak mit nya enda ulih perindang indai iya, dia apai tuai bansa Lawai nya mansang kia, iya lalu bejako,
“Kenapa anak kita iya selalu nangis, Endu ?” ko iya.
Ninga Lawai nanya iya, dia Bangi lalu nyaaut.
“Eh ! Enda aku nemu. Tak nyabak besari-sari nadai kebuah. Tengik bendar anak mit nya.” ko indai iya.

Ninga indai iya munyi nya, dia anak iya lalu nyabak balat agi, lalu maring ka diri sebelah bilik , sebelah ruai. Meda iya baka nya, dia Lawai lalu minta anak nya ari indai iya.
“Mun kita nisi dapat mujok anak kita iya Endu, bagus beri dengan aku aja. Kelak aku ngubat nya, “ ko Lawai.

Lemai nya Bangi enggai meri anak iya ngagai Lawai, laban iya agi sayau. Nyau kedua kali Lawai nya datai bedagang tajau kia, dia iya agi meda Bangi mengkang tusah ati ka anak mit nya. Anak nya lalu enda badu nyabak. Meda baka nya, dia Lawai lalu mansang kia ka baru. Iya nguji minta anak mit nya baru.

“O Endu”. Nyadi aku tu tiap-tiap kali datang di rumah kita tu, tiap-tiap aku mendiat anak kita nangis aja-aja. Mun kita enda dapat nginang anak kita iya, bagus aja beri dengan aku, untuk anak aku.” Pia ko Lawai nya. Ninga Lawai nya minta enggau ati manah, dia Bangi lalu bejako.
“Bai meh anak aku nya, ambi ka anak nuan. Enda aku nemu ngidup ka iya,” ko Bangi.

Ninga Endu Bangi udah meri, dia Lawai lalu beguai mai anak mit nya pulai. Kejang Lawai deka pulai, dia iya lalu meri tajau sigi.
“Nah Endu, tu tajau lama sigi aku beri ka kita, untuk tanda kita udah meri aku anak,” pia ko Lawai.
Meda Lawai nyua ka tajau, dia Endu Bangi lalu nyambut tajaau nya, lalu dibai iya tama ka bilik.

Lawai nya beguai nurun pulai enggau ati gaga mai anak mit nya. Udah anak mit nya ka anak Lawai, iya lalu badu agi nyabak. Datai di rumah, dia Lawai enggau bini iya sama bela gaga. Nyadi anak seduai nya digaga ka nama Abu Nasip laban iya ulih minta, lalu nambah ka nya seduai melaki-bini tak lantang senang ngidup ka diri sekumbang udah ngiru anembiak nya.

Abu Nasip nyau bujang, gamal iya sigat bendar. Iya lalu nampong apai iya bedagang tajau. Iya bedagang nyidi rumah ti udah alai apai iya bedagang. Nyau kepuas nya baru iya datai ba rumah sida indai lama iya Bangi. Iya endang enda nemu nya rumah iya empu, laban iya di iru Lawai agi mit. Nyadi gamal indai iya ti benama Bangi endang enda berubah tuai, enda tau tuai, seruran baka ke agi dara bungas suba.

Abu Nasip lalu datai ba rumah orang nya, iya lalu madah ka diri bedagang tajau. Leboh iya diau ba rumah orang, dia iya lalu bejalai niti rumah. Iya tepeda ka indu siko benung betenun di tengah ruai. Mata iya lalu lekat ba indu nya. Indu nya pan lekat ga mata meda Abu Nasip. Malam nya Abu Nasip lalu ngayap ngagai indu nya. Leboh indu nya meda Abu Nasip, iya lalu mai Abu Nasip berandau. Randau seduai putus, mai pangan jadi melaki bini.

Tawas hari siti, dia sida serumah, lalu begelumu nerang ka Abu Nasip jadi enggau indu nya, nitih ka adat bansa Memaloh. Udah nya Abu Nasip seduai bini iya lalu begulai sejalai, segulai makai, segulai tindok. Hari siti leboh seduai iya diau nadai pengawa, dia bini lalu ngangau ka iya.
“O Abu Nasip, semadi tua sama diau, uji dudok kitu, aku ngiga kutu nuan.”

Abu Nasip lalu dudok nunga moa bini iya. Bini iya lalu ngiga kutu iya. Nyau puas iya nyilak ka punjong pala, dia iya nyilak ka bouk ba kening Abu Nasip. Iya meda kening Abu Nasip bisi belitan mimit.
“O Abu,” ko bini iya.
“Nama kabuah kening nuan tu bisi litan ?”
“Eh, nuan tu enggai enda maioh utai ditanya,” pia ko iya. Laban jako Abu Nasip nya apin nyentok, dia bini iya itok nanya.
“Nama kebuah nuan enggai madah ka kabuah kening nuan belitan. Kada enda dibai nuan laboh niki kayu,” ko iya.

Ninga bini iya agi tatok nanya, dia iya lalu madah, ko iya.
“Kenu ko sida apai, kabuah kening aku tu bisi litan, laban leboh aku agi mit suba, aku meraaya bendar kelalu tengik, nadai pengawa bukai, tak nyabak besahari-sahari. Indai aku maia nya, ndi pengawa bukai, tak gawa betenun besahari-sahari. Dia indai aku enda liat ati lalu nekong pala aku enggau belia. Nya kabuah iya belitaan. Apai aku parai maia indai beranak ka aku. Udah nya aku di iru Lawai ke bedagang tajau.”

JADI MALI
Ninga munyi nya, dia bini Abu Nasip lalu bejako.
“Enti munyi nya, aku tu meh indai nuan, anak,” ko iya.
Dia seduai sama beberap lalu sama nyabak. Seduai ke beberap nya ba tengah ruai. Orang maioh lalu tekenyit meda seduai tak beberap dia.
“Oh, nama pengawa seduai tu, nama laya sida tu ?” pia ko orang. Orang lalu begau kia.

Udah nya seduai lalu tebelengka. Endu Bangi lalu bejako.
“Kabuah kami duai beberap, laban ati kami duai sama sinu ngenang pangan diri. Diatu baru aku nemu anak diri. Iya pan diatu ga nemu aku indai iya. Aku baru nemu diri jadi enggau anak diri empu, iya pan baru nemu diri jadi enggau indai diri,” ko Bangi.

Ninga jako Bangi nya tadi, nya baru orang maioh nemu seduai jadi salah, jadi mali. Bansa Memaloh endang bisi adat besai bendar. Sida enda tau jadi malibaka nya. Nitih ka adat bansa Memaloh, orang ke jadi mali salah serak baka nya enda tau idup, mesti dibunoh. Seduai lalu sama ditanchang orang kaki-jari. Tang taja nya dibunoh, seduai enda dibunoh ngena duku tauka dipantang ngena aur.

Udah seduai sama ditanchang kaki-jari, seduai disan oraang, lalu dianjong orang ngagai kampong puang. Sekumbang ke bejalai di rantau jalai, dia tuai sida lalu bejako.
“Kitai nganjong seduai tu, enda tau semak menoa kitai tu, enggai ka menoa kitai tu nyadi kamah, lalu tau ngudi dunya. Laban ari asal kitai Memaloh, enti orang jadi baka tu endang salah besai. Seduai endang dibunoh ka dua-dua,” ko iya.

Tuai Memaloh enggau bala iya lalu nuju Bukit Mandai. Datai di Bukit Mandai, dia sida meda batang tapang sakayu besai bendar. Tapang nya ba gerinjing bukit sigi ti tebiang bendar, tumboh nukil ba tisi tebiang. Penyuh pun tapang ny ari Tebelian Semaia kira rapas nyawa pangkong setawak. Datai sida dia lalu ngambi Abu Nasip, kaki enggau jari iya ditanchang, udah nya lalu ditanchang ngagai batang tapang.

Udah sida Nanchang Abu Nasip ngembar batang tapang, dia sida lalu maai Endu Bangi ngagai tinting Bukit Mandai muak ari sapiak, tunga ka matahari mati. Nyadi tinting bukit nyaa ninding bendar, tang ari baroh bukit ke ninding nya bisi tanah landai. Sida lalu mai Bangi kia. Kabuah iya landai, laban nya balai burong enggau jelu.

Tembu sida ngikat kaki jari Bangi, dia iya lalu ditanchang ka sida ngembar batang kayu ke dikumbai Kayu Palai, diteju ka mati dia. Udah nya sida lalu pulaai. Baka nya ko adat Memaloh enti sida jadi salah. Apin lama orang ke nganjong seduai udah ngelebus pulai, dia seduai lalu bekangau pangan diri. Seduai sinu beserara, lalu sinu dibuai diperinsa ka orang dalam kampong. Seduai ngenang diri enda tau enda mati.

“O indai bini aku ! Agi idup nuan,” ko Abu Nasip.
“Agi aku tu idup, anak laki aku,” ko Bangi.

Seduai seruran bekangau munyi nya berairi-ari sampai ka seput apus. Taja jauh ari pangan diri, nyawa seduai sama terang didinga siko-siko. Lalu sekumbang seduai ti bekangau nya bukit ke alai seduai ditanchang ka orang nya majak bekansat ngagai pangan diri. Pia mega bukit ke alai Tebelian Semaia enggau Buloh Pengerindu lalu bekansat ngagai seduai ti bekangau, laban pun Tebelian Semaia enggau Buloh Pengerindu sinu ninga seduai bekangau enggau diri sama diri.

Nyadi nyawa seduai ti bekangau nya, makin lama makin manah agi. Semoa bansa jelu enggau semmoa bansa burong ti mansa ninga nyawa seduai bekangau enda tau enda ngetu ba tengah-tengah bukit tiga igi nya. Nyawa seduai ti didingao burong enggau jelu nya nyinu ka ati sida magang. Leboh sida udah datai dia, sida enda tepulai ka diri agi. Perut sida lapar enda berasai agi. Tulang lembut enda dipeduli laban ati sida tekelalu sinu ninga leka kangau seduai. Semoa utai idup menseput, jelu, burong, ular, embayar, enggau kayu-rumput nyabak magang ninga leka kangau seduai nya.

Seduai iya seruran ruong-ruong bekangau nyabak siang malam. Leka kangau seduai nya endang asai ka ngeruntoh ka tungkol atau gagang ati. Daun Buloh Pengerindu ke ba tuga Tebelian Semaia pan nyabak sinu ka seduai nya. Nya ngasoh semoa daun kayu enggau rumput nyau runggu magang-magang. Tujoh hari tujoh malam seduai iya bekangau, udah nya baru nadai didinga nyawa agi. Abu Nasip mati ditanchang ngagai batang tapang, lalu Endu Bangi mati dilamun tanah lideh bukit nya. Semoa burong enggau jelu pan mati magang nyereta seduai iya.

Taja seduai iya lama udah mati, tapang enggau lideh bukit nya endang agi mengkang nyentok ka sehari tu. Nambah ka nya, daun Buloh Pengerindu pan agi mengkang bemunyi datai ke sehari tu. Nyadi bansa burong, jelu enggau ular enti sida mansa dia diatu, sida enda tau enda ngetu, lalu enda tepulai kadiri agi. Sida mati dia, sinu ati ninga munyi utai ba Bukit Mandai senentang nya. Tulang jelu, burong enggau ular nyau baka tugong pandok empa pemaioh udah prai ba endor nya.


MEMALOH NAMA KELIMIN
Nyadi rambau nya menya bisi bansa Memaloh siko benama Kelimin diau ba menoa semak nya. Nyadi Kelimin tu tak tuyu-tuyu pendiau, enda nemu begulai enggau orang. Tang taja pendiau iya tuyu-tuyu, tang gamal iya sigat.

Nyadi sekumbang Kelimin nya udah bujang dia apai enggau indai iya selalu nanya indu ka bini iya, tang siko pan nadai ga indu deka jadi enggau iya. Ninga indai Kelimin nanya, dia indu lalu nyumpah.
“Sapa deka ka anak nuan ke lungau-ngigau nya, nyamai agi kami jadi enggau jelu enggau antu,” ko indu.
Tiap-tiap kali apai enggau indai Kelimin nanya indu, seduai iya puas disumpah indu dara. Kebuah seduai keran deka ngasoh Kelimin bebini, laban iya ank tunggal seduai iya.

Bisi deh indu dara sida serumah benama Sayan. Sayan nya bajik ari indu dara bukai dalam rumah nya dia. Ninga apai seduai indai ngasoh iya bebini Sayan, dia Kelimin lalu ngayap. Leboh iya tama kibong Sayan, dia iya lalu dipalu orang ke indu ngena kayu.
“Gong, engkerumong, bebendai, nyarai dikenaa apai seduai indi nuan ngupah aku, enggai meh aku jadi enggau nuan,” ko Sayan nganu Kelimin.
“Isa aku mati enda belaki, enda meh aku jadi enggau nuan, “ko iya.

Udah nya Kelimin lalu pulai, nyabak nunga apai seduai indai iya. Iya madah ka diri malu dianu Endu Sayan. Sida menyanak lalu sama nyabak ngenang pemalu diri empu ti di ke enggai ka semoa indu ti ditanya sida. Malam nya Kelimin lalu tindok di sadau dlam tibang padi. Iya nyabak ngenang pemalu diri. Dia mata iya lelap, lalu pejam tindok. Iya lalu bemimpi, asai ke ngelelang ka diri dalam kampong puang. Leboh iya ke bejalai nya, dia iya ngasai ka diri lalu rembus baa rumah orang sebuah, niki rumah orang nya. Iya lalu ngangau.

“Oi ! Ni kita ke empu rumah ? Bisi ditu kita ?” ko iya.
Ninga nyawa orang ngangau, dia seduai melaki-bini ke empu rumah lalu pansut ke ruai.
“Oi ! Sapa kita tu ?” pia ko orang lelaki dalam rumah nya.
“Aku meh tu. Uji kelalu dulu,” pia ko Kelimin.
Ninga munyi nya, dia bini orang nya lalu merening moa Kelimin.
“Nuan tu Kelimin ?” ko indu nya.
“Au, aku meh tu, “ ko Kelimin.
“Lalu, dudok meh Kelimin. Tu baku sarang pinang, sarang insap,” ko seduai.
Nyau puas sida tiga ke berandau ka utai bukai, dia Kelimin lalu nanya.
“Sapa empu menoa tu deh ?” ko Kelimin.
“Nyadi menoa tu ke alai kami dua tu ditu, tu meh menoa Mandai Mati. Semoa kami ke diau ditu orang ke udah mati magang. Nama aku tu Kemping Padi Belimbing Besi, Sempa Jawa Sitangga Tali. Bini aku nya Kumang Lemping Sebayan nama iya,” pia ko lelaki nya.
“Nyadi nuan Kelimin enda tau lama diau ba menoa kami ditu, laban nuan aapin mati, enti nuan udah mati, nya baru tau beguli enggau kami ditu. Nama pejalai nuan deh Kelimin ?” pia ko Kemping Padi.

“Berat meh pejalai aku tu. Aku deka bebini lalu indu nadai deka jadi enggau aku. Orang indu nyumpah aku, nyumpah apai-indai aku. Malu meh kami tiga laban jako orang. Enti seduai ulih nulong aku, aku tu minta kasih ari seduai,” pia ko Kelimin.
“Anang nuan irau ati Kelimin. Ingat ka pesan aku tu. Enti nuan udah datai di menoa kita din ila, nuan tau ngambi sempiar batang Tapang ti alai orang nanchangka niang Abu Nasip suba, ambi nuan mimit. Ambi nuan mimit ga tanah bukit ke alai orang Nanchangka niang Endu Bangi nya suba. Daun tauka batang Buloh Pengerindu ba tuga Tebelian Semaia ti semak nya ambi mimit ga. Enti nuan udah bulih semoa utai nya tadi, lalu simpan nuan dalam puchong mit, champur nuan enggau minyak. Nya gelut nuan ba sebelah tuboh nuan. Enti nuan udah ngena minyak nya ila, ni-ni pan pemaanah gamal indu deka meh sida diambi nuan ke bini. Nya indu ti di ka deka nuaan lalu sampi sebut nuan nama iya. Enti indu nya meda nuan ila, indu nya enda tau enda nitih ka nuan. Enti indu nya enggai ka nuan, indu nya mati. Enti iya agi idup, iya enda tau enda nitih ka nuan, laban nya nitih ka semaia sumpah Abu Nasip seduai Endu Bangi. Nyadi tapang nya disebut orang Tapang Bekumbai, lalu tanah nya disebut orang Tanah Palai, lalu buloh nya disebut orang Buloh Pengerindu. Nyadi Tapang Bekumbai enggau Tanah Palai endang alai Abu Nasip seduai Endu Bangi bekangau leboh seduai agi idup sampai ka seduai mati. Taja seduai udah mati, tang nyawa seduai mengkang didinga orang bekangau. Enti nuan ngambi nya, nuan anang enda mai piring. Piring nuan baka tu: Piring tujoh turun tujoh, jani tujoh iko, manok tujoh iko. Nya baru nuan tau ngambi utai nya. Enti nuan enda bepiring nuan enda ulih pulai agi. Ingat nuan ka pesan aku tu,” pia ko Kemping Padi.

Kelimin pan baru k angkat pulai dia iy tekenyit, lalu tedani. Udh dani di iya lalu ngingat ka semengat iya ti bejalai. Nya baru iy nemu nya mimpi.
“Manah aku tu end agi tindok, tang lalu ngingat ka pesan Kemping Padi,” ko iya.

Tawas hari nya, iya lalu ngasoh indai iya ngaga perengka piring. Tembu indai iya ngaga piring, iya lalu nangkap anak jani tujoh iko, manok tujoh iko, lalu simpan iya dalam selabit. Udah nya Kelimin lalu nurun bejalai. Semoa orang dalam rumah nya alit ati meda iya bejalai mi jani enggau manok. Nyau puas iya bejalai sehari-hari, dia iya lalu datai ba Bukit Mandai. Datai iya dia lalu niki nengah bukit ti renjan bendar. Jalai ke ditengah iya mar bendar. Iya nengah selikap batu, bepaut ba lumut batu

Bala burong enggau kusing ngenjing chelum terebai ngelambong puchok pala iya. Iya enda beduli ka pemar jalai, laban iya keras deka datai ba tuchong bukit nya. Iya datai ba senentang tanah bisi entap mimit, dia iya ngetu. Ari nya iya tepeda ka puchok tapang besai bendar, dan iya nyau rinda. Nyadi puchok tapang nya, leboh nyawa Endu Bangi seduai Abu Nasip bekangau iya lalu ngelentik terengkah ka tanah lalu malai tanah alai Endu Bangi. Malik Kelimin sepiak, dia iya meda perugan pun buloh. Puchok buloh nya rapat bendar. Sereta iya meda buloh nya, ati iya sinu bendar.

Ba lebak antara pun Buloh Pengerindu, Tapang Bekumbai enggau Tanah Palai dia iya meda rapoh tulang jelu. Puas iya ngemata ka pendiau jelu enggau burong, dia tulang iya berasai lembut, ati iya tusah, ai mata iya bekeberai laboh, iya asai ke deka tindok.

Udah nya iya nyerungkai ma lalu ngatur piring. Tembu miring, iya lalu munoh jani tujoh iko enggau manok tujoh iko. Tembu miring, lalu nyampi nunda ajar Kemping Padi. Udah nyampi nya baru tulang iya berasai kering baru, tuboh iya berasi lempong.

Iya lalu nganjong piring ngagai pun Tapang Bekumbai, Buloh Pengerindu enggau Tanah Palai. Leboh iya ngengkah ka piring, iya lalu berampas ngambi utai nya mimit-mimit. Udah iya bulih semoa utai nya, iya lalu beguai pulai. Leboh iya datai ba kaki bukit, dia iya lalu manjong. Di rantu jalai iya pulai nya maioh bendar utai ngemba iya, sida antu, sida jelu beruang enggau ular. Iya pan datai ga di rumah sida empu.

Kelimin lalu niki. Leboh iya niti rumah maioh bendar orang ngangau ka iya, tang iya enda iboh ka sida. Datai iya ba ruai sida empu lalu terus tama ka bilik, lalu niki ka sadau nganti hari petang. Malam nya iya lalu ngayap. Tembu iya beradu ngunsut ka jayau ti ulih iya tadi, iya lalu nurun ngayap ngagai Endu Sayan.
“Nuan nya Kelimin,” ko Sayan tepeda ka iya.
“Au, aku meh tu,” ko iya.
Sayan lalu maut bau iya, mai iya gali. Iya lalu tindok enggau Sayan malam nya. Tawas hari iya pulai. Meda Kelimin pulai, dia Sayan lalu nitih ka iya. Seduai lalu jadi melaki-bini.

Kelimin seduai Sayan nya meh orang dulu nemu nama utai ke dikumbai Tapang Bekumbai, Tanah Palai enggau Buloh Pengerindu.

Wednesday 21 September 2011

SELAMAT BEKELALA

Selamat tengahari, ngagai bala pemacha...

Aku penulis blog meri terima kasih enggau selamat bekelala ba ruai ke terubah kitai betemu. Ngarap ke semua ulih sama begempung niri ke padung jaku iban, terebai sama ngerembai adat bansa kitai. Enti salah anang ga kita guai mantah muntang jalai medah. Sama meh kitai nyeruri tali temeran adat bansa diri enti enda sapa meh agi....


 


 


 

~~~~~INDU  IBAN~~~~~~~